Дундговь аймагт 2018 - 2019 оны өвөлжилтийн тойм

Агаарын температурыг олон жилийн дундажтай харьцуулбал  2018 оны 12 дугаар сард Дэрэн суманд олон жилийн дунджийн орчим, бусад нутгаар олон жилийн дунджаас 1,4 - 4,3 градусаар хүйтэн  байлаа. 2019 оны 1 дүгээр сард Эрдэнэдлай суманд олон жилийн дунджийн орчим, бусад ихэнх нутгаар олон жилийн дунджаас 1,8 – 3,3 градусаар дулаан, 2 дугаар сард Дэрэн, Цагаандэлгэр, Өндөршил сумдад олон жилийн дунджийн орчим, бусад нутгаар олон жилийн дунджаас 1,6 – 5,6 градусаар хүйтэн байлаа.  

Агаарт 30 градусаас хүйтэн 2018 оны 12 дугаар сард Сайхан-Овоо, Эрдэнэдалай сумдад 7 - 11 шөнө, 33 градус хүйтэн, бусад нутгаар 1-5 шөнө, 30-34 градус хүйтэн хоносон, 2019 оны 1 дүгээр сард  Сайхан-Овоо, Эрдэнэдалай сумдад 3 - 7 шөнө, 31-33 градус хүйтэн, Адаацаг, Дэрэн сумдад 1 шөнө, 30-31 градус хүйтэн, 2 дугаар сард Эрдэнэдалай, Сайхан-Овоо сумдад 10-12 шөнө,  35-36 градус хүйтэрсэн, Луус, Хулд, Гурвансайхан сумдаас бусад нутгаар 1-8 шөнө 30-34 градус хүрч хүйтэрсэн.

Хур тунадас нийт нутгаар 2018 оны 12 дугаар сард ихэнх нутгаар 1 - 3  удаа 0,0 – 1,9 мм  орсон, Дэлгэрхангай, Говь-Угтаал, Эрдэнэдалай сумдад 0,5-1,9 мм буюу олон жилийн дунджаас ахиу, бусад нутгаар олон жилийн дунджаас бага хур тунадас орсон. Өндөршил, Баянжаргалан сумдад хур тунадас ороогүй.  2019 оны 1 дүгээр сард нийт нутгаар  1 - 4 удаа 0,0 - 1,0 мм цас орсон ба ихэнх нутгаар олон жилийн дунджаас орчим буюу бага орсон. 2 дугаар сард нийт нутгаар 1-4 удаа 0,0-4,6 мм цас орсон бөгөөд ихэнх нутгаар олон жилийн дунджаас ахиу,  Цагаандэлгэр, Дэрэн, Луус сумдын нутгаар олон жилийн дунджаас бага хур тунадас орсон.

Цас 2018 оны 12 дугаар сарын 31-ны өдрийн байдлаар Дэлгэрхангай, Адаацаг суманд 0 см зузаантай 5 – 9 баллын мөстсөн цастай, Сайхан-Овоо, Луус сумдад 1-4 баллын мөстсөн цастай, бусад ихэнх нутгаар цасгүй байна. 2019 оны 1 дүгээр сард 31-ны өдрийн байдлаар Адаацаг, Луус, Дэлгэрхангай сумдад 1-4 баллын мөстсөн цастай, бусад ихэнх нутгаар цасгүй байна. 2 дугаар сарын 28-ны өдрийн байдлаар Сайхан-Овоо, Эрдэнэдалай, Өлзийт, Дэлгэрхангай сумдад 0-1 см зузаантай 5-9 баллын мөстсөн цастай,  Дэрэн, Луус, Хулд сумдад 1-4 баллын мөстсөн цастай, бусад нутгаар цасгүй. 3 дугаар сарын 10-ны өдрийн байдлаар Сайхан-Овоо сум 5-9 балл, Дэлгэрхангай суманд 1-4 баллын мөстсөн цастай, бусад ихэнх нутгаар цасгүй.

2018-2019 оны өвөл тус аймагт цасан шуурга аюултай үзэгдлийн хэмжээнд болоогүй, салхи багатай, цас багатай, 2 дугаар сарын эхний арав хоногт бага зэрэг хүйтэрснийг эс тооцвол өнтэй өвөл боллоо.