Цаг уурын мэдээ > Хөдөө аж ахуйн цаг уурын тойм

2020 оны 7 сарын цаг агаарын тойм мэдээ

Шинэчлэгдсэн: 2020-08-11 15:45:43

Энэ сард агаарын дундаж температур нийт нутгаар 20,4 – 24,7 градус дулаан байсан нь олон жилийн дундажтай харьцуулахад Эрдэнэдалай, Өндөршил сумдад олон жилийн дунджийн орчим, бусад нутгаар олон жилийн дунджаас 1,1 - 2,5 градусаар дулаан байлаа. Өдөртөө нийт нутгаар 33 - 36 градус дулаан, шөнөдөө 8 - 12 градус дулаан  байжээ. Агаарт 30 градусаас дээш нийт нутгаар 7 - 20 өдөр халсан.

Хөрсний гадарга дээр өдөртөө Хулд, Адаацаг сумдад 57 - 58 градус, бусад нутгаар 59 - 64 градус дулаан, шөнөдөө нийт нутгаар 6 - 10  градус дулаан байжээ.  Хөрсөн дээр 40 градусаас дулаан 25 - 31 өдөр халсан.

Салхины их хурд нийт нутгаар түр зуур 12 – 26 м/с хүрч 2 – 25 удаа 10 м/с-ээс их салхитай өдөр ажиглагдсан.

Хур тунадасны хувьд нийт нутгаар 11,8 – 66,6 мм хур тунадас орсон. Баянжаргалан суманд 66,6 мм, Говь-Угтаалд 55,4 мм, Өлзийт, Өндөршил сумдад 26,9 – 31,4 мм хур тунадас буюу олон жилийн дунджаас ахиу, Цагаандэлгэр суманд 54,9 мм, Эрдэнэдалай, Дэрэн сумдад 30,7 – 33,8 мм буюу олон жилийн дунджийн орчим, Мандалговь, Адаацаг сумдад 20,9 – 21,6 мм, бусад нутгаар 11,8 – 12,9 мм  буюу олон жилийн дунджаас бага хур тунадас,   4 -13 өдөр хур тунадас орсон.

Энэ 10 хоногт хөдөө аж ахуйн үйлдвэрлэлд  малчид отор нүүдэл хийх,  хурга ноослох зэрэг ажил  явагдахад цаг агаар тааламжгүй халуун хуурай салхитай байлаа. Малын усан хангамжийн  хүрэлцээ дунд зэрэг байна. Бэлчээрийн ургамал хур тунадас орсноор нутгийн хойд хэсгээр сэргэж, зуншлага дунд зэрэг болж байна, ургамлын өндөр дунджаар 2 - 8 см, ургац 0,0 – 0,8 ц/га, ургамлын ургалтын байдал Адаацаг, Өндөршилийн зүүн, урд тал, Говь-Угтаал, Луусын баруун, урд тал, Баянжаргалангийн баруун тал,  Өлзийт, Сайнцагаан, Сайхан-Овоо, Дэлгэрхангай, Хулд сумдад муу буюу нийт нутгийн 50 гаруй хувь, бусад нутгаар дунд зэрэг байна.

Цаг агаарын нөхцөл байдал халалтаас үүссэн түр зуурын аянга цахилгаантай аадар бороо, хүчтэй нөөлөг салхинаас малчид, ард иргэд сэрэмжтэй байхыг анхааруулж байна.

Тойм бичсэн:  ЦУОТХэлтсийн ХААЦУ инженер  Б. Болортуяа.