2022 оны 8 сарын цаг агаарын тойм мэдээ

Энэ сард агаарын дундаж температур нийт нутгаар 16,1 – 21,0 градус дулаан байсан нь олон жилийн дундажтай харьцуулахад Цагаандэлгэр суманд олон жилийн дунджаас 1,5 градусаар сэрүүн, бусад нутгаар олон жилийн дунджийн орчим байлаа. Өдөртөө Гурвансайхан, Өлзийт сумдад 35 – 37 градус, бусад нутгаар 29 - 34 градус дулаан, шөнөдөө нийт нутгаар 2 – 5 градус дулаан  байжээ. Агаарт 30 градусаас давж Адаацаг сумаас бусад сумдад 2 - 11 өдөр халсан.

Хөрсний гадарга дээр өдөртөө нийт нутгаар 54 – 62 градус дулаан, хөрсөн дээр 40 градусаас дулаан өдрийн тоо нийт нутгаар 14 - 27 өдөр,  шөнөдөө нийт нутгаар 0 - 4  градус дулаан байжээ. 

Салхины их хурд түр зуур Мандалговь, Гурвансайхан, Эрдэнэдалай, Цагаандэлгэр сумдад 21 – 28 м/с,  бусад нутгаар 12 - 20 м/с хүрч 3 – 21 удаа 10 м/с-ээс их салхитай өдөр ажиглагдсан.

Хур тунадасны хувьд нийт нутгаар 7 - 15 удаа 4,4 – 89,1 мм  орсон ба олон жилийн дундажтай харьцуулахад Адаацаг суманд 89,1 мм, Цагаандэлгэр суманд 73,5 мм, Дэрэн суманд 53,5 мм, Говь-Угтаалд 42,6  мм, Эрдэнэдалайд 39,6 мм буюу  олон жилийн дунджаас ахиу, Мандалговьд 25,5 мм, Гурвансайхан, Луус, Өндөршил сумдад 15,9 – 18,6 мм, Сайхан-Овоо, Баянжаргалан сумдад 10,6 – 12,6 мм, бусад нутгаар 4,4 – 6,8 мм буюу олон жилийн дунджаас бага хур тунадас орсон.

Энэ 10 хоногт хөдөө аж ахуйн үйлдвэрлэлд  малчид отор нүүдэл хийх,  гүү барих, малын угаалага зэрэг ажил  явагдахад цаг агаар тааламжтай байсан. Малын усан хангамж  хүрэлцээтэй. Бэлчээрийн ургамал хазаар, крыловын хялгана, таана үрийн боловсролтын үе шатанд  ургаж байна, ургамлын өндөр дунджаар 3 - 21 см, ургац 0,0 – 3,0 ц/га, ургамлын ургалтын байдал Сайнцагааны хойд тал, Адаацаг, Дэрэн, Говь-Угтаал, Цагаандэлгэр сумдын нутгаар сайн буюу нийт нутгийн 30 хувь, Сайхан-Овоо, Дэлгэрхангай, сумын баруун, зүүн тал, Хулд сумдад муу буюу нийт нутгийн 20 хувь нь, бусад нутгаар  дунд зэрэг буюу нийт нутгийн 50 хувь нь гандуу. Бог малын мялзан халдварт өвчин зарим сумдад илэрсэн, вакцинжуулалт хийгдэж байна.

Цаг агаарын нөхцөл байдал халалтаас үүссэн түр зуурын аянга цахилгаантай аадар борооноос малчид, ард иргэд сэрэмжтэй байхыг анхааруулж байна.

Тойм бичсэн: ЦУОТХэлтсийн ХААЦУ инженер  Б. Болортуяа.