2023 оны 01 сарын цаг агаарын тойм мэдээ

Энэ сард агаарын дундаж температур нийт нутгаар 13,7 – 18,7 градус хүйтэн байсан нь олон жилийн дундажтай харьцуулахад нийт нутгаар олон жилийн дунджаас 1,1 – 3,1  градусаар дулаан байлаа. Агаарт  өдөртөө Адаацаг, Цагаандэлгэр сумдад 3 – 4 градус хүйтэн, бусад нутгаар 0 - 4 градус дулаан, шөнөдөө нийт нутгаар 32 - 36 градус хүйтэн  байжээ. Агаарт нийт нутгаар 30 градусаас хүйтэн 1 – 2 хоног үргэлжилсэн.

Хөрсний гадарга дээр өдөртөө Сайхан-Овоо, Адаацаг сумдад 1 – 2 градус хүйтэн, бусад нутгаар 2 - 10 градус дулаан, шөнөдөө Өндөршил, Цагаандэлгэрт 39 градус, бусад нутгаар 32 - 37  градус хүйтэн байжээ.

Салхины их хурд түр зуур нийт нутгаар 14 - 25 м/с хүрч 6 – 21 удаа 10 м/с-ээс их салхитай өдөр ажиглагдсан.

Хур тунадасны хувьд ихэнх  нутгаар 1 - 5 удаа 0,0 – 2,8 мм цас орсон ба олон жилийн дундажтай харьцуулахад Дэлгэрхангай 2,8 мм буюу олон жилийн дунджаас ахиу, Өлзийт, Луус, Сайхан-Овоо сумдад 0,4 - 1,6 мм буюу олон жилийн дунджийн орчим,  бусад нутгаар 0,0 – 0,6 мм буюу олон жилийн дунджаас бага хур тунадас орсон. Адаацагт хур тунадас ороогүй.  

Тус сарын 31-ны өдрийн байдлаар Адаацаг, Цагаандэлгэр, Сайхан-Овоо сумдад 0 - 2 см зузаантай, 5 - 9 баллын сэвсгэр цастай, бусад нутгаар 1-4  баллын мөстсөн цасан бүрхүүл тогтоод байна. Дэрэн, Гурвансайхан, Говь-Угтаал, Баянжаргалан, Өндөршил сумдад цасгүй байна.

Энэ 10 хоногт хөдөө аж ахуйн үйлдвэрлэлд  малчид өвөлжөөндөө  малдаа нэмэгдэл тэжээл өгөх ажил үргэлжилж байна, гаднаас нэлээд малчид оторлож байгаа. 21, 22-нд агаарт 32-36 градус хүрч огцом хүйтэрч мал бэлчээрлэхэд хүндрэлтэй байлаа. Малын усан хангамжийн  хүрэлцээ хэвийн байна.

Тойм бичсэн:  ЦУОТХэлтсийн ХААЦУ инженер  Б. Болортуяа.