2021 оны 9 сарын цаг агаарын тойм мэдээ

Энэ сард агаарын дундаж температур нийт нутгаар 11,4 – 16,2 градус дулаан байсан нь олон жилийн дундажтай харьцуулахад нийт  нутгаар олон жилийн дунджаас 1,1 – 2,3 градусаар дулаан байлаа. Өдөртөө нийт нутгаар 24 - 29 градус дулаан, шөнөдөө 4 градус хүйтнээс 1 градус дулаан байжээ.

Хөрсний гадарга дээр өдөртөө Баянжаргалан суманд 52 градус, Говь-Угтаал, Өндөршил, Адаацагт 42 – 43 градус, бусад нутгаар 45 - 50 градус дулаан, шөнөдөө Цагаандэлгэрт 7 градус, бусад нутгаар 2 - 6 градус хүйтэн хоносон.

Салхины их хурд түр зуур нийт нутгаар 12 - 23 м/с, Эрдэнэдалай, Гурвансайхан, Мандалговь,Говь-Угтаал сумдад 21 – 23 м/с аюултай үзэгдлийн хэмжээнд хүрч 4 – 21 удаа 10 м/с-ээс их салхитай өдөр ажиглагдсан.

Хур тунадасны хувьд нийт нутгаар 5 - 11 удаа 4,3 – 42,3 мм  орсон ба олон жилийн дундажтай харьцуулахад Цагаандэлгэрт 42,3 мм, Говь-Угтаалд 37,6 мм, Дэрэн, Өлзийт 30,3 - 33,3 мм, Дэлгэрхангай, Мандалговь, Адаацаг, Баянжаргалан сумдад 27,5 – 29,4 мм, Гурвансайхан, Эрдэнэдалай сумдад 21,2 – 22,0 мм буюу ихэнх нутгаар олон жилийн дунджаас ахиу,  Сайхан-Овоод 9,4 мм буюу олон жилийн дунджийн орчим, Өндөршилийн нутгаар 4,3 мм буюу олон жилийн дунджаас бага хур тунадас орсон.

Энэ сард хөдөө аж ахуйн үйлдвэрлэлд  малчид отор нүүдэл хийх,  мал саах, гар тэжээл бэлтгэх зэрэг ажил  явагдахад цаг агаар тааламжтай дулаан байсан. Малын усан хангамж  хүрэлцээ дунд зэрэг. Бэлчээрийн ургамал хатаж, хагдарч эхэлж байна, ургамлын өндөр дунджаар 6 - 15 см, ургац 0,2 – 1,3 ц/га, ургамлын ургалтын байдал Сайхан-Овоогийн баруун, хойд, зүүн тал, Хулдын баруун, зүүн тал, Адаацагийн баруун, хойд тал, Дэлгэрхангайн баруун талын нутгаар хэвийн, буюу нийт нутгийн 20 орчим хувь хэвийн,  Баянжаргалангийн хойд, урд талын нутгаар муу буюу 5 орчим хувь,  бусад нутгаар дунд зэрэг буюу нийт нутгийн 75 хувь нь байна.

Тойм бичсэн:  ЦУОТХэлтсийн ХААЦУ инженер  Б. Болортуяа.